Surabhi Jayashree Jagdish
कॅन्सरची काही लक्षणं सुरुवातीला साधी वाटतात. मात्र ती दीर्घकाळ टिकून राहिल्यास दुर्लक्ष करणं धोकादायक ठरू शकतं. कॅन्सरचा ट्यूमर ज्यावेळी तुमच्या शरीरात तयार होत असतो तेव्हा कोणती ७ लक्षणं दिसतात ते पाहूयात.
सतत थकवा जाणवणं हे कॅन्सरच्या सुरुवातीच्या लक्षणांपैकी एक मानले जाते. हा थकवा विश्रांती घेतल्यानंतरही कमी होत नाही. योग्य आहार, पुरेशी झोप आणि आराम घेतल्यानंतरही शरीरात शक्ती जाणवत नसेल, तर ते गंभीर संकेत असू शकतात.
अनेक वेळा कोणतंही कारण नसताना वजन झपाट्याने कमी होणं हे देखील धोक्याचं आहे. विशेषतः पचनसंस्था आणि फुफ्फुसांच्या कॅन्सरमध्ये असे प्रकार अधिक दिसून येतात. ट्यूमरमुळे शरीरातील चयापचय प्रक्रियेत बदल होतात, ज्यामुळे भूक कमी लागते.
शरीरातील काही वेदना दीर्घकाळ टिकून राहिल्यास त्याचा संबंध कॅन्सरशी असतो. अनेक रुग्णांमध्ये सतत होणारी वेदना हे पहिलं लक्षण असू शकतं. पाठीचा त्रास हा स्वादुपिंड किंवा अंडाशयाच्या कॅन्सरशी संबंधित असू शकतो.
काही कॅन्सर शरीराच्या आत नव्हे तर त्वचेवरही दिसून येतात. जखम भरून न येणं किंवा त्वचेच्या रंगात बदल होणं ही लक्षणं गंभीर ठरू शकतात. काही वेळा विचित्र प्रकारचे पुरळही त्वचेच्या कॅन्सरचे संकेत असू शकतात.
शरीरात अचानक गाठ जाणवणं किंवा एखादा भाग जाड झाल्यास त्याकडे दुर्लक्ष करू नये. सर्व गाठी कॅन्सरच्या नसल्या तरी त्या सुरुवातीच्या लक्षणांपैकी एक असू शकतात. स्तनाचा किंवा टेस्टिक्युलरच्या कॅन्सरमध्ये हे लक्षणं दिसतं.
दीर्घकाळ टिकणारा खोकला गंभीर आजाराचे संकेत असू शकतो. विशेषतः खोकल्यात रक्त येत असल्यास त्वरित तपासणी करून घ्यावी. धूम्रपान करणाऱ्या व्यक्तींमध्ये घशाच्या कॅन्सरवेळी हे लक्षण दिसून येतं.
वारंवार आणि न थांबणारी डोकेदुखी काही वेळा न्यूरोलॉजिकल समस्यांचे संकेत देऊ शकते. मेंदूमध्ये ट्यूमर असल्यास अशा प्रकारची लक्षणं दिसू शकतात.