Surabhi Jayashree Jagdish
सतत घाम येऊन धूळ साचण्याने मानेवर काळेपणा येतो. अनेकदा सूर्यप्रकाश, प्रदूषण आणि त्वचेची योग्य स्वच्छता न केल्यानेही त्वचा काळवंडते. त्यामुळे मान नियमित स्वच्छ ठेवणं महत्त्वाचं असतं.
मानेचा काळेपणा घालवण्यासाठी एक घरगुती उपाय आहे. १ चमचा बेसन पीठ आणि १ चमचा मसूर डाळीचे पीठ घ्या. यामध्ये अर्ध्या लिंबाचा रस, चिमूटभर हळद आणि १ चमचा ताजा कोरफडीचा गर मिसळावा. शेवटी मिश्रण एकजीव करण्यासाठी दही किंवा कच्चे दूध घालावं.
बेसन त्वचेवरील अतिरिक्त तेल आणि घाण स्वच्छ करण्यास मदत करतं. मसूर डाळीचं पीठ मृत त्वचा काढून त्वचा मऊ आणि स्वच्छ बनवते. हे दोन्ही पदार्थ एकत्र वापरल्यास त्वचेचा नैसर्गिक उजाळा वाढण्यास मदत मिळते.
लिंबामध्ये नैसर्गिक ब्लिचिंग गुणधर्म असतात. त्यामुळे काळेपणा कमी होण्यास मदत होते. हळद त्वचेला स्वच्छ ठेवण्यास आणि त्वचेवरील जंतू कमी करण्यास उपयुक्त ठरते.
कोरफडीचा ताजा गर त्वचेला थंडावा देतो आणि त्वचा कोरडी पडू देत नाही. दही किंवा कच्चं दूध त्वचेचं पोषण करून त्वचा मऊ बनवण्याचं काम करतं. त्यामुळे ही पेस्ट लावल्यानंतर मान अधिक स्वच्छ दिसते.
तयार केलेला लेप मानेला लावून हलक्या हाताने चोळावा. त्यानंतर हा लेप साधारण १० मिनिटे मानेवर तसाच ठेवावा. नंतर थोडे पाणी लावून पुन्हा हलक्या हाताने मसाज करत लेप धुवून टाकावा.
हा उपाय आठवड्यातून एकदा नियमित केल्यास चांगला परिणाम दिसू शकतो. सतत वापर केल्याने मानेवरील डेड स्किन आणि काळेपणा कमी होण्यास मदत मिळते.