Manasvi Choudhary
कांदा हा आहारातील महत्वाचा घटक मानला जातो. परंतु, बाजारातून कांदा खरेदी करताना जर योग्य काळजी घेतली नाही, तर आर्थिक आणि आरोग्याचे नुकसान होऊ शकते.
कांदा खरेदी करताना त्यांच्या गुणवत्तेकडे लक्ष देणे महत्वाचे आहे. ताजे, दर्जेदार आणि टिकणारे कांदे निवडण्यासाठी काही सोप्या गोष्टींची काळजी घेणे महत्वाचे आहे.
कांदा निवडताना त्याची बाहेरील साल कागदासारखी कोरडी आणि कुरकुरीत असली पाहिजे. ती सहजपणे निघेल अशी असावी. जर साल ओलसर असेल, तर तो कांदा लवकर सडण्याची शक्यता असते.
कांदा खरेदी करताना तो हातात घेऊन हलकासा दाबून तपासावा. उत्तम दर्जाचा कांदा हातात घेतल्यावर पूर्णपणे घट्ट आणि कडक लागला पाहिजे. जर तो बोटाने दाबल्यावर आत दबला, तर याचा अर्थ तो आतून सडलेला किंवा पोकळ असू शकतो.
अनेकदा बाजारात कांद्यांना हिरवे कोंब फुटलेले असतात. कांद्याला कोंब आल्यानंतर त्यातील ओलावा आणि सर्व पोषण तत्वे कमी होतात, ज्यामुळे त्याची चव पूर्णपणे बदलते. असे कांदे विकत घेणे टाळावे.
हिरवे किंवा ओले पडलेले कांदे कधीही घेऊ नका. तसेच कांद्यावर काळी पावडर किंवा बुरशी दिसल्यास आणि त्यातून मंद वास येत असल्यास ते कांदे खराब झालेले असतात.
बाजारातून कांदे पिशवीत आणल्यानंतर तसेच बंद ठेवू नका. त्यांना हवेशीर जागी मोकळे ठेवावे, जेणेकरून ओलावा साचणार नाही आणि कांदे दीर्घकाळ टिकतील.