Surabhi Jayashree Jagdish
बीटचा ज्यूस प्यायल्याने शरीराला अनेक फायदे मिळतात. त्वचेवर ग्लो येण्यासोबतच हृदयाच्या आरोग्यासाठीही बीटचा ज्यूस फायदेशीर मानला जातो. त्यामुळे अनेकजण आरोग्यदायी आहाराचा भाग म्हणून बीटचा ज्यूस नियमितपणे घेतात.
बीटचा ज्यूस सर्वसाधारणपणे आरोग्यासाठी चांगला मानला जात असला, तरी काही लोकांना त्याचा फायदा होण्याऐवजी त्रास होऊ शकतो. आधीपासून काही आरोग्य समस्या असलेल्या व्यक्तींनी बीटचा ज्यूस घेताना काळजी घेणं आवश्यक आहे.
बीटमध्ये ऑक्सलेट आणि पोटॅशियमचं प्रमाण जास्त असतं. ऑक्सलेटमुळे किडनी स्टोनचा धोका वाढू शकतो. त्यामुळे किडनीशी संबंधित समस्या असलेल्या लोकांनी बीटचा ज्यूस घेण्यापूर्वी डॉक्टरांचा सल्ला घ्यावा.
बीटचा ज्यूस ब्लड प्रेशर कमी करण्यास मदत करू शकतो. त्यामुळे लो ब्लड प्रेशरचा त्रास असलेल्या व्यक्तींनी बीटचा ज्यूस घेताना सावधगिरी बाळगावी. तसंच ब्लड प्रेशरची औषधं घेणाऱ्यांनीही बीटचा ज्यूस घेण्यापूर्वी डॉक्टरांचा सल्ला घ्यावा.
बीटमध्ये नैसर्गिक साखर असते, त्यामुळे डायबेटीस असलेल्या किंवा रक्तातील साखरेचं नियंत्रण राखण्यात अडचण येत असलेल्या लोकांनी बीटचा ज्यूस कमी प्रमाणात घ्यावा. बीटचा ज्यूस किती प्रमाणात घ्यायचा, हे आपल्या आरोग्याची स्थिती लक्षात घेऊन ठरवणं महत्त्वाचं आहे.
काही लोकांना बीटचा ज्यूस प्यायल्यानंतर लघवीचा रंग लालसर किंवा गुलाबी झालेला दिसू शकतो. बीटच्या सेवनामुळे असा बदल जाणवू शकतो आणि त्यासोबत इतर त्रास होत असल्यास त्याकडे लक्ष देणं आवश्यक आहे.
एखाद्या व्यक्तीला किडनीची समस्या असेल किंवा ती नियमित औषधे घेत असेल तर बीटचा ज्यूस घेण्यापूर्वी डॉक्टरांचा सल्ला घेणं आवश्यक आहे. मात्र कमी प्रमाणात बीटचा ज्यूस घेणं सर्वसाधारणपणे हेल्दी आहाराचा भाग ठरू शकते.
ही माहिती विविध सार्वजनिक स्रोतांवर आधारित असून केवळ सामान्य माहितीसाठी देण्यात आली आहे. या माहितीची स्वतंत्र वैद्यकीय पडताळणी आम्ही केलेली नाही. कोणतीही लक्षणे आढळल्यास स्वतः निष्कर्ष काढण्याऐवजी तज्ज्ञ डॉक्टरांचा सल्ला घ्या.