Surabhi Jayashree Jagdish
गाडीच्या काचेवर साचलेली वाफ हटवण्यासाठी डिफॉगरचा वापर करणं हा एक सोपा उपाय आहे. यासाठी डॅशबोर्डवरील पुढील काचेसाठी असलेले डिफॉगर बटण सुरू करा. यामुळे हवेचा प्रवाह पुढील काचेकडे वळतो आणि काचेवर साचलेला ओलावा कमी होऊन रस्ता स्पष्ट दिसू लागतो.
हिवाळ्यात थंडी असली तरी गाडीच्या काचेवर साचलेली वाफ हटवण्यासाठी एसीचा उपयोग होतो. गाडीचा एसी सुरू करून फ्रेश एअर मोड निवडा, जेणेकरून बाहेरची ताजी हवा गाडीच्या आत येईल आणि आतील ओलावा कमी होण्यास मदत होईल.
गाडीच्या काचेवर वाफ साचली असेल तर खिडक्या थोड्या उघडल्याने मदत होऊ शकते. यामुळे बाहेरची हवा गाडीच्या आत येते आणि आतील व बाहेरील हवेतील तापमान व आर्द्रतेचा फरक कमी होण्यास मदत होते.
गाडीतील डिफॉगर किंवा एसी लगेच काम करत नसेल, तर स्वच्छ कापडाचा उपयोग करून काचेवरील वाफ पुसता येते. यासाठी गाडीमध्ये नेहमी एक मऊ आणि स्वच्छ कापड ठेवा, जेणेकरून गरज पडल्यास त्याचा वापर करता येईल.
गाडीच्या मागील काचेवर वाफ साचल्यास मागील काचेसाठी असलेले डिफॉगर बटण सुरू करा. या डिफॉगरमध्ये काचेवर असलेल्या बारीक रेषा गरम होतात आणि त्यामुळे काचेवरील ओलावा कमी होतो. मागील काच स्वच्छ झाल्यामुळे रिअर-व्ह्यू मिररमधून मागील बाजूच्या गाड्या पाहणं सोपं होतं.
गाडीच्या आत जास्त ओलावा असल्यास काचेवर वाफ साचण्याची शक्यता वाढते. त्यामुळे ओले कपडे, पाण्याने भिजलेल्या वस्तू किंवा ओलसर मॅट शक्यतो गाडीत ठेवू नका. आतील ओलावा कमी ठेवल्याने काचेवर वारंवार वाफ साचण्याची समस्या कमी होण्यास मदत होते.
गाडी चालवण्यापूर्वी पुढील आणि बाजूच्या काचा स्वच्छ आहेत की नाही, हे तपासून घ्या. काचेवर वाफ साचलेली असल्यास डिफॉगर किंवा एसी सुरू करून ती पूर्णपणे काढून टाका. काचेतून रस्ता स्पष्ट दिसू लागल्यानंतरच गाडी चालवा. कारण कमी दृश्यमानतेमुळे अपघाताचा धोका वाढू शकतो.