Surabhi Jayashree Jagdish
चेहऱ्यावरील केस शेव्ह केल्याने ते जाड, दाट किंवा अधिक वेगाने वाढतात हा समज पूर्णपणे चुकीचा आहे. शेव्हिंगमुळे फक्त त्वचेच्या पृष्ठभागावरील केस कापले जातात, केसांच्या मुळांवर त्याचा कोणताही परिणाम होत नाही.
स्वच्छ आणि धारदार रेझरचा वापर करून योग्य पद्धतीने फेस शेव्हिंग केल्यास ते सुरक्षित मानलं जातं. शेव्हिंग करण्यापूर्वी चेहरा व्यवस्थित स्वच्छ करणं आणि स्वच्छ रेझर वापरणं अत्यंत महत्त्वाचं आहे. योग्य काळजी घेतल्यास त्वचेवरील संसर्ग आणि इरिटेशनचा धोका कमी होतो.
फेस शेव्हिंगमुळे चेहऱ्यावरील बारीक केस त्वरित दूर होतात आणि त्वचा अधिक नितळ दिसते. शेव्हिंगनंतर फाउंडेशन आणि इतर मेकअप प्रोडक्स्ट्स त्वचेवर अधिक चांगल्या प्रकारे बसतात. तसंच शेव्हिंगदरम्यान मृत त्वचेच्या पेशी दूर झाल्याने हलकं एक्सफोलिएशनही होतं.
चुकीच्या पद्धतीने शेव्हिंग केल्यास त्वचेवर जळजळ, खाज किंवा रेझर बर्न होऊ शकतो. रेझर वापरताना त्वचेवर लहान कट, ओरखडे किंवा लालसरपणा दिसू शकतो. काही वेळा केस त्वचेच्या आत वाढू लागल्याने इंग्रोन हेअर आणि लहान पुटकुळ्यांची समस्या निर्माण होऊ शकते.
सेंसेटीव्ह त्वचा असलेल्या महिलांनी फेस शेव्हिंग करण्यापूर्वी त्वचारोग तज्ज्ञांचा सल्ला घ्यावा. चेहऱ्यावर मुरुम, एक्झिमा, सोरायसिस किंवा रॅशेस असल्यास त्या भागावर शेव्हिंग टाळणं योग्य आहे. अशा स्थितीत शेव्हिंगमुळे त्वचेची समस्या अधिक वाढू शकते.
चेहऱ्यावर अचानक किंवा नेहमीपेक्षा जास्त केस वाढत असतील तर त्यामागे हार्मोनल बदल असण्याची शक्यता असते. अशा वेळी केवळ शेव्हिंग करून समस्या लपवण्याऐवजी त्यामागील कारण शोधणं आवश्यक आहे.
नेहमी स्वच्छ, निर्जंतुक आणि धारदार फेस रेझरचाच वापर करावा. शेव्हिंगनंतर त्वचेला मॉइश्चरायझर लावावं आणि बाहेर जाताना सनस्क्रीनचा वापर करावा. शेव्हिंगनंतर सतत जळजळ, लालसरपणा किंवा इन्फेक्शन दिसल्यास त्वरित तज्ज्ञांचा सल्ला घ्यावा.
ही माहिती विविध सार्वजनिक स्रोतांवर आधारित असून केवळ सामान्य माहितीसाठी देण्यात आली आहे. या माहितीची स्वतंत्र वैद्यकीय पडताळणी आम्ही केलेली नाही. कोणतीही लक्षणे आढळल्यास स्वतः निष्कर्ष काढण्याऐवजी तज्ज्ञ डॉक्टरांचा सल्ला घ्या.