Surabhi Jayashree Jagdish
कोळ्यांना घरातील शांत, अंधाऱ्या आणि कमी वापरल्या जाणाऱ्या जागा आवडतात. सोफा किंवा बेडच्या मागे, स्टोअर रूममध्ये, कपाटाच्या मागे आणि जुन्या सामानामध्ये कोळी जाळी तयार करू शकतात. त्यामुळे घराची नियमित स्वच्छता करा आणि पंखे, खिडक्यांचे कोपरे, दरवाजांच्या मागील बाजूस तसेच फर्निचरच्या आसपास झाडू किंवा व्हॅक्यूम क्लीनरने स्वच्छता करा.
अनेकदा कोळी दरवाजे आणि खिडक्यांमधील छोट्या फटींमधून घरात प्रवेश करतात. त्यामुळे खिडक्यांच्या चौकटी, दरवाजांच्या कडा, पाइपच्या आसपास आणि हवा येण्या-जाण्याच्या जागा तपासा. कुठे फट किंवा मोकळी जागा दिसल्यास ती सील करा आणि खिडक्यांची जाळी फाटली असल्यास दुरुस्त करा.
घरातील एखाद्या विशिष्ट कोपऱ्यात वारंवार कोळ्यांची जाळी तयार होत असेल, तर पांढऱ्या व्हिनेगरचा वापर करू शकता. यासाठी पांढरे व्हिनेगर आणि पाणी समप्रमाणात घेऊन एका स्प्रे बॉटलमध्ये एकत्र करा. हे मिश्रण खिडक्यांच्या चौकटी, दरवाजांच्या आसपास आणि जाळी दिसणाऱ्या जागांवर हलके फवारा.
कोळ्यांचा त्रास कमी करण्यासाठी फक्त घराच्या आतील स्वच्छता पुरेशी नाही तर घराबाहेरही स्वच्छता ठेवणं गरजेचं आहे. घराच्या भिंतींना लागून वाढलेल्या झुडपांमध्ये, झाडांमध्ये, लाकडांच्या ढिगाऱ्यांमध्ये आणि जुन्या सामानामध्ये कोळी लपून बसू शकतात. त्यामुळे घराच्या बाहेरील भिंतींपासून झाडं थोडी दूर ठेवा.
घरातील स्टोअर रूम, कपाटांच्या मागील बाजू आणि फर्निचरखालील जागा यांची वेळोवेळी तपासणी करा. अशा ठिकाणी कोळी सहज लपून राहू शकतात आणि जाळी तयार करू शकतात. त्यामुळे या जागांमधील धूळ आणि कोळ्यांची जाळी नियमितपणे स्वच्छ करा.
बाल्कनीमध्ये अनेकदा जुन्या वस्तू, रिकामे बॉक्स आणि इतर सामान बराच काळ पडून राहते. अशा सामानामध्ये कोळ्यांना लपण्यासाठी जागा मिळू शकते आणि ते तिथे जाळी तयार करू शकतात. त्यामुळे बाल्कनीतील अनावश्यक वस्तू काढून टाका आणि ही जागा नियमितपणे स्वच्छ ठेवा.