Surabhi Jayashree Jagdish
Endocrine Connections या जर्नलमध्ये प्रकाशित झालेल्या अभ्यासात मांडीचा आकार आणि रक्तदाब यांच्यातील संबंध तपासण्यात आला. अभ्यासात जास्त जांघेचा घेर असलेल्या व्यक्तींमध्ये उच्च रक्तदाबाचे प्रमाण तुलनेने कमी आढळलं.
चीनमधील Shanghai Jiao Tong University मधील संशोधकांनी ४० वर्षे किंवा त्यापेक्षा जास्त वयाच्या ९,२५० पुरुष आणि महिलांच्या आरोग्यविषयक माहितीचा अभ्यास केला. यापैकी ५,३४८ व्यक्ती जास्त वजनाच्या किंवा लठ्ठ होत्या, तर ४,१७२ व्यक्ती सामान्य वजनाच्या होत्या.
पुरुषांमध्ये ५५ सेंटीमीटरपेक्षा जास्त आणि महिलांमध्ये ५४ सेंटीमीटरपेक्षा जास्त जांघेचा घेर असलेल्या व्यक्तींमध्ये हा संबंध दिसून आला. याउलट पुरुषांमध्ये ५१ सेंटीमीटरपेक्षा कमी आणि महिलांमध्ये ५० सेंटीमीटरपेक्षा कमी जांघेचा घेर असलेल्या व्यक्तींमध्ये उच्च रक्तदाबाची शक्यता अधिक असल्याचं अभ्यासात आढळले.
संशोधकांच्या मते, पोटाभोवती साठणाऱ्या चरबीच्या तुलनेत मांड्यांमध्ये त्वचेखाली साठणारी चरबी आणि स्नायूंचं प्रमाण चयापचयाच्या दृष्टीने वेगळे परिणाम करू शकते. त्यामुळे शरीरातील चरबी कुठे साठते हे एकूण चरबीच्या प्रमाणाइतकेच महत्त्वाचं ठरू शकतं.
या अभ्यासातून जाड मांड्या असलेल्या व्यक्तींना हार्ट अटॅकचा धोका कमी असतो, असं थेट सिद्ध झालेलं नाही. अभ्यासाचा मुख्य निष्कर्ष मांडीचा आकार आणि उच्च रक्तदाब यांच्यातील संबंधावर आधारित आहे, हार्ट अटॅकच्या घटनांवर नाही.
पोटाभोवती जास्त चरबी साठणं हे चयापचयाशी संबंधित अनेक आजारांशी जोडलेलं आहे. त्यामुळे केवळ वजन किंवा शरीराचा एखादा भाग पाहण्याऐवजी कंबरेचा घेर, रक्तदाब, रक्तातील साखर, कोलेस्ट्रॉल आणि एकूण जीवनशैली यांचा विचार करणं अधिक महत्त्वाचं आहे.
मांडीचा मोठा घेर हा काही लोकांमध्ये तुलनेने कमी रक्तदाबाशी संबंधित असू शकतो. मात्र हा अभ्यास निरीक्षणाधारित असल्याने जाड मांड्यांमुळेच रक्तदाब कमी होतो किंवा हृदयविकाराचा धोका कमी होतो, असं कारण देणं योग्य नाही.
ही माहिती विविध सार्वजनिक स्रोतांवर आधारित असून केवळ सामान्य माहितीसाठी देण्यात आली आहे. या माहितीची स्वतंत्र वैद्यकीय पडताळणी आम्ही केलेली नाही. कोणतीही लक्षणे आढळल्यास स्वतः निष्कर्ष काढण्याऐवजी तज्ज्ञ डॉक्टरांचा सल्ला घ्या.