Shreya Maskar
दिवाळी म्हटलं की फराळाच्या ताटात चकली, लाडू, चिवडा आणि खुसखुशीत करंजी हवीच! बाहेरून कुरकुरीत आणि आतून गोडसर खोबऱ्याचे सारण असलेली करंजी हा पारंपरिक दिवाळी फराळाचा लोकप्रिय पदार्थ आहे.
करंजी बनवण्यासाठी मैदा, तूप, मीठ, पाणी, तेल, सुके खोबरे, पिठीसाखर, खसखस, काजू-बदाम, बेदाणे, वेलची पूड, आणि जायफळ पूड इत्यादी साहित्य लागते.
करंजी बनवण्यासाठी सर्वप्रथम पॅन गरम करून त्यात सुके खोबरे मंद आचेवर हलके भाजून घ्या. त्यानंतर खसखस, काजू-बदाम आणि बेदाणे घालून थोडे परतून घ्या.
हे मिश्रण पूर्ण थंड झाल्यावर त्यात पिठीसाखर, वेलची पूड आणि जायफळ पूड घालून व्यवस्थित मिसळा. अशाप्रकारे करंजीचे गोड सारण तयार झाले आहे.
एका भांड्यात मैदा, चिमूटभर मीठ आणि गरम तूप घालून चांगले एकत्र करा. त्यानंतर थोडे थोडे पाणी घालून घट्ट पीठ मळून घ्या. पीठ ओल्या कापडाने झाकून २० ते ३० मिनिटे बाजूला ठेवा.
पिठाचे छोटे गोळे करून पातळ गोल पुऱ्या लाटा. पुरीच्या मध्यभागी तयार केलेले सारण ठेवा. पुरीच्या कडांना थोडे पाणी लावून अर्धचंद्राकार घडी घाला आणि कडा घट्ट बंद करा. करंजी कटरच्या मदतीने कडा सुंदर आकारात कापून घ्या.
कढईत तेल गरम करून मंद आचेवर करंज्या गोल्डन फ्राय करा. तयार करंज्या थोड्या थंड झाल्यावर हवाबंद डब्यात ठेवून द्या.
पिठात गरम तूप योग्य प्रमाणात घातल्याने करंजीची पारी खुसखुशीत होण्यास मदत होते.करंजीचे पीठ घट्ट मळा. पीठ खूप मऊ असल्यास पारीचा कुरकुरीतपणा कमी होतो.