Shreya Maskar
दिवाळी म्हटले की फराळ आलाच. मात्र, सणाच्या दिवसांत तळलेले, तेलकट, गोड आणि मसालेदार पदार्थ जास्त खाल्ल्यामुळे काही लोकांना अॅसिडिटी, छातीत जळजळ, पोट फुगणे, ढेकर येणे आणि अपचनाचा त्रास होऊ शकतो. ॲसिडिटी होऊ नये आणि झाल्यावर काय करावे, जाणून घ्या.
चकली, चिवडा, करंजी, शेव आणि लाडू हे पदार्थ एकाच वेळी भरपूर खाणे टाळा. थोड्या प्रमाणात फराळ खा आणि पोट भरल्याची जाणीव झाल्यावर खाणे थांबवा. यामुळे पोटावर अतिरिक्त ताण पडण्याची शक्यता कमी होते.
दिवाळीत वेगवेगळे पदार्थ चाखण्याच्या नादात गरजेपेक्षा जास्त खाल्ले जाते. त्याऐवजी दिवसभरात योग्य अंतराने संतुलित आहार घ्या. जेवणाच्या अगदी आधी किंवा लगेच नंतर भरपूर फराळ खाणे टाळा.
जास्त तेलकट पदार्थ पोट रिकामे होण्याची प्रक्रिया मंदावू शकतात. त्यामुळे काही लोकांना पोट जड वाटणे, ढेकर येणे किंवा अॅसिडिटीचा त्रास होऊ शकतो. शक्यतो कमी तेलात तयार केलेले पदार्थ निवडा.
जेवण किंवा फराळ केल्यानंतर लगेच आडवे झाल्यास पोटातील आम्ल अन्ननलिकेत परत येण्याची शक्यता वाढते. विशेषतः रात्रीचे जेवण झोपण्याच्या किमान २–३ तास आधी घ्या. जेवणानंतर १०–१५ मिनिटे हलके चालल्याने पचनास मदत होऊ शकते.
दिवसभर थोड्या-थोड्या अंतराने पाणी प्या. पुरेसे पाणी शरीरातील द्रवांचे संतुलन राखण्यास आणि बद्धकोष्ठता टाळण्यास मदत करते. मात्र, एकाच वेळी खूप पाणी पिण्याऐवजी गरजेनुसार पाणी घ्या.
थोडे-थोडे पाणी प्या आणि जेवल्यानंतर सरळ बसा किंवा हलके चाला. रात्री झोपताना अॅसिडिटी होत असल्यास जेवण आणि झोप यामध्ये पुरेसे अंतर ठेवा. मसालेदार आणि तेलकट पदार्थ टाळा.
वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या, डॉक्टरांच्या सल्ल्यानं घ्यावीत.