Shreya Maskar
डाळ तडका रेसिपी बनवण्यासाठी चणा डाळ, हळद, तूप किंवा तेल, जिरे, कांदा, टोमॅटो, आले-लसूण पेस्ट, धणे पूड, लाल तिखट, गरम मसाला, कोथिंबीर, हिंग, मीठ आणि सुक्या लाल मिरच्या इत्यादी साहित्य लागते.
ढाबा स्टाईल डाळ तडका बनवण्यासाठी सर्वप्रथम चणा डाळ स्वच्छ धुवून घेऊन जवळपास ३० मिनिटे पाण्यात भिजत ठेवा. नंतर प्रेशर कुकरमध्ये डाळ, हळद, मीठ आणि पुरेसे पाणी घालून ३ ते ४ शिट्ट्या होईपर्यंत शिजवा.
आता एका मोठ्या कढईत तूप किंवा तेल गरम करा. त्यात जिरे, हिंग घालून चांगले तडतडू द्या. त्यानंतर सुक्या लाल मिरच्या, आले-लसूण पेस्ट घालून चांगले मिक्स करा.
त्यानंतर बारीक चिरलेला कांदा टाकून गोल्डन फ्राय करा. चिरलेले टोमॅटो घालून मऊ होईपर्यंत शिजवा. नंतर धणेपूड, लाल तिखट आणि गरम मसाला घालून मसाले चांगले परतून घ्या.
आता उकडलेली चणा डाळ घालून चांगले मिसळा. डाळीत मसाले मुरण्यासाठी मंद आचेवर ४-५ मिनिटे शिजवा. शेवटी वरून बारीक चिरलेली हिरवीगार कोथिंबीर घाला.
अशाप्रकारे ढाबा स्टाईल डाळ तडका तयार आहे. तुम्ही तंदुरी रोटी, पराठे, जिरे भात किंवा साध्या भातासोबत सर्व्ह करा.
फोडणीसाठी नेहमी तुपाचा वापर करा, ज्यामुळे डाळीला ढाब्यासारखी चव येते. मसाले चांगले भाजून घ्या, ज्यामुळे डाळीचा स्वाद आणि सुगंध वाढतो.
डाळ आधी भिजवल्याने ती लवकर शिजते आणि तिची चवही चांगली लागते. डाळ खूप घट्ट झाल्यास, आपल्या आवडीनुसार पातळ करण्यासाठी थोडे गरम पाणी घाला.