Surabhi Jayashree Jagdish
गरम चहासोबत खायला कुरकुरीत पिझ्झा पफ हा परफेक्ट स्नॅक आहे. घरच्या घरी पीठ, भाज्या, पिझ्झा सॉस आणि चीज वापरून हे सहज तयार करता येतात. बाहेर मिळणाऱ्या पफसारखी चव घरच्या घरी मिळते आणि मुलांनाही हा पदार्थ खूप आवडतो.
पिझ्झा पफ बनवण्यासाठी मैदा, बेकिंग पावडर, मीठ आणि तेल वापरून पीठ मळावं लागतं. स्टफिंगसाठी स्वीट कॉर्न, मटार, शिमला मिरची, लसूण, पिझ्झा सॉस आणि चीज वापरलं जातं.
एका मोठ्या भांड्यात मैदा, मीठ, बेकिंग पावडर आणि थोडे तेल एकत्र मिसळा. त्यात थोडं-थोडं पाणी घालून घट्ट आणि मऊ पीठ मळा. हे पीठ 10-15 मिनिटं झाकून ठेवलं की ते व्यवस्थित सेट होतं.
कढईत थोडं तेल गरम करून त्यात लसूण, कॉर्न, मटार आणि शिमला मिरची परतून घ्या. भाज्या हलक्या शिजल्यावर त्यात पिझ्झा सॉस, मीठ, मिरी आणि किसलेलं चीज घाला. हे मिश्रण 2-3 मिनिटं परतून तयार स्टफिंग एका भांड्यात काढून ठेवा.
मळलेलं पीठ पोळीसारखे लाटून त्याचे चौकोनी तुकडे करा. एका बाजूला तयार स्टफिंग ठेवा आणि दुसरी बाजू त्यावर दुमडून बंद करा. कडांना काट्याने दाब दिला की पफ नीट सील होतो आणि आकार छान दिसतो.
कढईत तेल गरम करून हे पफ सोनेरी रंग येईपर्यंत तळा. तळल्यावर ते बाहेरून कुरकुरीत आणि आतून मऊ होतात. हवं असल्यास ओव्हनमध्ये बेक करूनही कमी तेलात हे पफ तयार करता येतात.
गरमागरम पिझ्झा पफ चहासोबत खाल्ले तर त्याची चव आणखी वाढते. त्यावर ओरेगॅनो, चिली फ्लेक्स किंवा थोडं टोमॅटो सॉस घालून सर्व्ह करता येतं. हा स्नॅक संध्याकाळच्या नाश्त्यासाठी किंवा मुलांच्या टिफिनसाठीही योग्य आहे.