Shreya Maskar
नारळपाणी प्यायल्यानंतर उरलेला नारळ फेकून न देता, त्यापासून शुद्ध तेल बनवता येईल. हे तेल नियमित लावल्यास केस घनदाट आणि चमकदार होतील.
ओल्या नारळाचे तेल बनवण्यासाठी सर्वप्रथम नारळाचा गर लहान तुकड्यांमध्ये कापा. त्यात थोडे पाणी घालून मिक्सरमध्ये चांगले वाटून पातळ पेस्ट बनवा.
वाटलेला नारळ एका स्वच्छ कापडात ठेवून चांगला पिळून घ्या. काढलेले नारळाचे दूध एका वेगळ्या भांड्यात गोळा करा.
आता नारळाचे दूध एका पातेल्यात ओता आणि मंद आचेवर शिजवा. मिश्रण तळाला चिकटू नये म्हणून अधूनमधून ढवळत राहा. दुधातील पाणी हळूहळू आटून जाईल. त्यानंतर नारळाच्या जाड भागापासून तेल वेगळे होईल. तेल पूर्णपणे वेगळे झाल्यावर गॅस बंद करा.
प्रथम तेल थंड होऊ द्या. यानंतर ते एका स्वच्छ कापडातून किंवा बारीक चाळणीतून गाळून घ्या. तयार केलेले तेल एका स्वच्छ आणि पूर्णपणे कोरड्या काचेच्या बाटलीत साठवा.
तेल जास्त प्रमाणात वापरण्याची गरज नाही. थोडेसे तेल टाळूवर आणि केसांच्या मुळांवर लावा आणि बोटांच्या टोकांनी हलक्या हाताने मालिश करा. ते केसांवर सुमारे ३० ते ६० मिनिटे तसेच राहू द्या आणि नंतर सौम्य शाम्पूने केस धुवा.
नारळाचे तेल केस मऊ करण्यास आणि कोरडेपणा कमी करण्यास मदत करते. त्याच्या वापरामुळे केसांना कंडिशनिंग मिळते, ज्यामुळे केस रेशमी बनतात.
हे तेल पहिल्यांदा लावण्यापूर्वी, त्वचेच्या लहान भागावर थोडेसे तेल लावून संवेदनशीलतेची टेस्ट करा. जळजळ किंवा त्रास जाणवल्यास, त्याचा वापर थांबवा.