Surabhi Jayashree Jagdish
वजन कमी करण्यासाठी आहाराकडे विशेष लक्ष देणं गरजेचं असतं. आहारातून जास्त कॅलरी असलेले पदार्थ कमी केल्यास वजन कमी करण्याच्या प्रयत्नांना मदत होऊ शकते. फळं आणि भाज्यांसोबतच कमी कॅलरी असलेल्या काही चटण्यांचाही आहारात समावेश करता येतो.
बहुतेक घरांमध्ये सहज तयार केली जाणारी कोथिंबीर-पुदिन्याची चटणी वजन कमी करण्यास मदत करते. ही चटणी तयार करण्यासाठी कोथिंबीर, पुदिना, हिरवी मिरची, चवीनुसार मीठ आणि लिंबाचा रस लागतो.
टोमॅटोमध्ये पाणी आणि फायबरचं प्रमाण असल्याने वजन कमी करण्यासाठी ते उपयुक्त मानलं जातं. टोमॅटोमध्ये कॅलरी कमी असून त्यात अँटीऑक्सिडंट्सही असतात, तर त्यात लसूण घातल्याने चटणीची चव आणि गुणधर्म वाढतात.
नारळामध्ये फायबर आणि अँटीऑक्सिडंट्सचं प्रमाण असतं. कढीपत्ताही वजन कमी करण्यासाठी उपयुक्त मानला जात असल्याने नारळ आणि कढीपत्त्याची चटणी आहारात घेता येते.
दालचिनी हा स्वयंपाकघरात अनेक पदार्थांमध्ये वापरला जाणारा मसाला आहे. तो पदार्थांना वेगळी चव देतो. वजन कमी करण्यासाठी दालचिनीचा नियमित आहारात समावेश करण्याचा सल्ला दिला जातो. दालचिनीची कडवट चव कमी करण्यासाठी सफरचंदासोबत त्याची चटणी तयार केली जाते.
कैरीमध्ये कॅलरी कमी आणि फायबरचं प्रमाण जास्त असतं. त्यामुळे ही चटणी आहारात समाविष्ट करता येते आणि कच्चा आंबा मेटाबॉलिझम व्यवस्थित ठेवण्यास तसंच पचनक्रिया सुधारण्यास मदत करतो.
या चटण्या घरच्या घरी तयार करून नेहमीच्या जेवणासोबत घेता येतात. कमी कॅलरी असलेल्या चटण्यांमुळे जेवणाची चव वाढवण्यासोबत आहारात फळं, भाज्या आणि इतर पौष्टिक घटकांचा समावेश करता येतो.
ही माहिती विविध सार्वजनिक स्रोतांवर आधारित असून केवळ सामान्य माहितीसाठी देण्यात आली आहे. या माहितीची स्वतंत्र वैद्यकीय पडताळणी आम्ही केलेली नाही. कोणतीही लक्षणे आढळल्यास स्वतः निष्कर्ष काढण्याऐवजी तज्ज्ञ डॉक्टरांचा सल्ला घ्या.