Shruti Vilas Kadam
अनारसे बनवण्यासाठी २ कप तांदूळ, १ कप गूळ, २ ते ३ चमचे खसखस आणि तळण्यासाठी तूप किंवा तेल घ्या. गुळाचे प्रमाण गोडीनुसार कमी-जास्त करू शकता.
तांदूळ स्वच्छ धुऊन ३ दिवस पाण्यात भिजत ठेवा. दररोज पाणी बदलून तांदूळ पुन्हा स्वच्छ पाण्यात भिजवा. तिसऱ्या दिवशी तांदूळ निथळून स्वच्छ कापडावर वाळवा.
तांदूळ पूर्णपणे वाळल्यानंतर मिक्सरमध्ये बारीक दळून घ्या. त्यानंतर चाळणीने पीठ चाळून घ्या, जेणेकरून अनारसे बनवताना त्याचा पोत चांगला राहील.
तांदळाच्या पिठात गूळ मिसळून मऊसर पीठ मळा. मिश्रण खूप कोरडे वाटल्यास थोडे दूध वापरू शकता. पीठ झाकून काही तास किंवा रात्रभर मुरू द्या.
पिठाचा छोटा गोळा घ्या आणि खसखशीवर हलकेच थापून गोल, चपट्या आकाराचा अनारसा तयार करा. अनारसा फार पातळ करू नका, अन्यथा तळताना तुटू शकतो.
कढईत तूप किंवा तेल गरम करा. अनारसे खसखस लावलेली बाजू वर ठेवून मध्यम ते मंद आचेवर तळा. ते सोनेरी आणि कुरकुरीत झाल्यावर बाहेर काढा. तेल अतिशय गरम नसावे.
तळलेले अनारसे टिश्यू पेपरवर किंवा जाळीवर काढून पूर्ण थंड होऊ द्या. त्यानंतर हवाबंद डब्यात साठवा. यामुळे त्यांचा कुरकुरीतपणा टिकण्यास मदत होते.