School Closed in Mumbai and Thane: पालकांनो लक्ष द्या! मुंबईसह ठाण्यातील शाळांना सुट्टी जाहीर, अतिवृष्टीच्या इशाऱ्यानंतर प्रशासनाचा निर्णय

School Closed in Mumbai and Thane: मुंबईसह ठाण्यात गेल्या काही दिवसांपासून पावसाची जोरदार बॅटिंग सुरू आहे. जोरदार पावसामुळे मुंबई आणि ठाण्यातील तलाव ओसंडून वाहू लागले आहेत. मुंबई आणि ठाण्यात उद्या मुसळधार पावसाचा अंदाज हवामान खात्याने वर्तवला आहे. यामुळे मुंबई आणि ठाणे प्रशासनाने शाळांना सुट्टी जाहीर केली आहे. (Latest Marathi News)

मुंबईला आज रात्री ८ वाजल्यापासून अतिवृष्टीचा इशारा जारी करण्यात आला आहे. मुंबई आणि ठाण्याला हवामान खात्याने अतिवृष्टीचा इशारा दिला आहे. हवामान विभागाने दिलेल्या इशाऱ्यानंतर मुंबईतील सर्व शाळांना सुट्टी जाहीर करण्यात आली आहे, अशी माहिती शिक्षणमंत्री दीपक केसरकर यांनी विधानपरिषदेत दिली. तर प्रशासनाने ठाण्यातील शाळांनाही सुट्टी जाहीर केली आहे.

ठाणे जिल्हा प्रशासनाने ठाण्यातील पहिली ते बारावीच्या विद्यार्थ्यांना सुट्टी जाहीर केली आहे. अतिवृष्टीच्या इशाऱ्यानंतर प्रशासनाने शाळा आणि महाविद्यालयांना सुट्टी देण्याचा निर्णय घेतला आहे, ठाणे जिल्हा परिषदेच्या शिक्षण विभागाने (प्राथमिक) ही माहिती दिली आहे.

मुंबईत जोरदार पाऊस

मुंबईत गेल्या ६ तासांत ( संध्याकाळी ७.४५ वाजेपर्यंत) अत्यंत तीव्र पावसाची नोंद आहे. मुंबईत पुढील ३-४ तास पाऊस असाच सुरू राहण्याची शक्यता असल्याचा अंदाज हवामान विभागाचा आहे.

ठाण्यातही मुसळधार पाऊस

भारतीय हवामान विभागाकडून उद्या मुंबई, ठाणे, पालघर आणि रायगड जिल्ह्यात ऑरेंज अलर्ट जारी करण्यात आला आहे.

राज्यातील कोणत्या जिल्ह्यांना रेड आणि ऑरेंज अलर्ट

हवामान विभागाने पुणे, सातारा, रत्नागिरी, चंद्रपूर, गडचिरोली या जिल्ह्यांमध्ये रेड अलर्ट जारी केला आहे. यामुळे या जिल्ह्यात अतिमुसळधार पावसाची शक्यता आहे. तर मुंबई, ठाणे, पालघर, रायगड, सिंधुदुर्ग, कोल्हापूर, भंडारा, गोंदिया, नागपूर, यवतमाळ या जिल्ह्यात ऑरेंज अलर्टमुळे मुसळधार पावसाची शक्यता आहे.