Shruti Vilas Kadam
मोतीचूर लाडू बनवण्यासाठी बारीक बेसन, साखर, पाणी, तूप किंवा तेल, वेलची पूड आणि आवडीनुसार केशरी फूड कलर घ्या. सजावटीसाठी पिस्त्याचे काप किंवा काजू वापरू शकता.
एका भांड्यात बारीक बेसन घ्या. त्यात थोडे थोडे पाणी घालून गुठळ्या नसलेले पातळ मिश्रण तयार करा. मिश्रण फार घट्ट किंवा फार पातळ नसावे, जेणेकरून बारीक बुंदी तयार होईल.
कढईत तूप किंवा तेल गरम करा. बारीक छिद्रांच्या झाऱ्याने बेसनाचे मिश्रण गरम तेलात सोडा. तयार होणारी बुंदी जास्त कुरकुरीत होऊ न देता हलकी तळून बाहेर काढा.
एका पातेल्यात साखर आणि पाणी घालून गरम करा. साखर पूर्ण विरघळल्यानंतर पाकाला थोडा चिकटपणा येऊ द्या. त्यात वेलची पूड आणि आवडीनुसार केशरी रंग घाला.
तयार बुंदी गरम साखरेच्या पाकात घालून व्यवस्थित मिसळा. बुंदीने पाक शोषून घेण्यासाठी काही मिनिटे झाकून ठेवा. मिश्रण खूप कोरडे वाटल्यास थोडासा गरम पाक घालू शकता.
मिश्रण कोमट असताना हाताला थोडे तूप लावा. त्यानंतर मिश्रणाचे छोटे भाग घेऊन गोल लाडू वळा. लाडू बांधले जात नसतील, तर मिश्रणाला थोडा वेळ मुरू द्या.
तयार मोतीचूर लाडूंवर पिस्त्याचे काप किंवा काजू लावा. लाडू पूर्ण थंड झाल्यावर हवाबंद डब्यात साठवा. अशा प्रकारे घरच्या घरी तयार केलेले स्वादिष्ट मोतीचूर लाडू दिवाळीच्या फराळात सर्व्ह करा.