Surabhi Jayashree Jagdish
वॉशिंग मशीनमध्ये क्षमतेपेक्षा जास्त कपडे भरण्याच्या चुकीला ओव्हरलोडिंग म्हणतात. यामुळे मशीनच्या ड्रमवर आणि मोटरवर जास्त ताण येतो. सतत असं केल्यास मशीनच्या कामावर परिणाम होऊ शकतो आणि तिचे महत्त्वाचे भाग खराब होण्याची शक्यता असते.
मशीनमध्ये खूप कपडे भरल्यास ड्रममध्ये त्यांना फिरण्यासाठी पुरेशी जागा मिळत नाही. त्यामुळे कपड्यांमधील घाण आणि डिटर्जंट व्यवस्थित निघत नाही. परिणामी कपडे धुतल्यानंतरही अस्वच्छ राहू शकतात आणि त्यांना दुर्गंधी येऊ शकते.
बाजारात ६ किलो, ७ किलो आणि ८ किलो क्षमतेच्या वॉशिंग मशीन उपलब्ध आहेत. मशीनची क्षमता म्हणजे एका वेळी ती किती वजनाचे कोरडे कपडे धुऊ शकते, हे दर्शवणारा आकडा असतो. त्यामुळे मशीनमध्ये कपडे टाकण्यापूर्वी तिची क्षमता तपासणं महत्त्वाचं आहे.
६ किलो क्षमतेच्या मशीनमध्ये हलके शर्ट आणि पँट मिळून साधारण ८ ते १० कपडे धुता येतात. ७ किलो क्षमतेच्या मशीनमध्ये साधारण ११ ते १३ कपडे धुता येतात. तर ८ किलो क्षमतेच्या मशीनमध्ये साधारण १४ ते १६ कपडे धुता येतात. मात्र कपड्यांचे वजन आणि जाडी यानुसार ही संख्या बदलू शकते.
मशीनमध्ये कपडे टाकल्यानंतर ड्रमच्या वरच्या बाजूला थोडी जागा रिकामी ठेवा. त्यानंतर कपड्यांच्या वर आणि ड्रमच्या आतील भागामध्ये हात सहज फिरतोय का ते तपासा. हात फिरवण्यासाठी पुरेशी जागा नसेल, तर मशीनमधून काही कपडे बाहेर काढा.
वॉशिंग मशीनचा ड्रम साधारण ७० ते ८० टक्केच भरण्याचा प्रयत्न करा आणि कपडे वरपर्यंत कोंबू नका. डिटर्जंट नेहमी त्याच्या पाकिटावर दिलेल्या प्रमाणानुसारच वापरा. जास्त डिटर्जंट टाकल्यास अतिरिक्त फेस तयार होतो आणि कपड्यांवर डिटर्जंटचे अवशेष राहू शकतात.
जड जीन्स, टॉवेल आणि हलके शर्ट किंवा टी-शर्ट एकाच वेळी धुणं टाळा. जड कपड्यांमुळे ड्रममधील वजनाचं संतुलन बिघडू शकतं आणि कपडे धुण्याच्या प्रक्रियेवर परिणाम होऊ शकतो. त्यामुळे जड आणि हलके कपडे वेगवेगळ्या वेळी धुवा आणि मशीनची क्षमता लक्षात घेऊनच कपडे भरा.