Surabhi Jayashree Jagdish
That_Driver9237 नावाच्या Reddit युजरने r/BangaloreRealEstates वर आपला अनुभव शेअर केलाय. त्याच्या पोस्टनुसार, सुमारे सहा वर्षांपूर्वी ते बेंगळुरूमध्ये 1 BHK घरात भाड्याने राहत होते आणि त्याच घराच्या मालकाकडून ते घर खरेदी करण्याची ऑफर त्यांना मिळाली होती. त्यावेळी त्याचं वय 26 वर्षे होतं आणि फ्लॅटची किंमत 30 लाख रुपये सांगण्यात आली होती.
त्या वेळी 30 लाख रुपये खर्च करून घर घेण्यापेक्षा कार खरेदी करणे त्यांना अधिक योग्य वाटलं. त्यामुळे त्यांनी 1 BHK फ्लॅटची ऑफर नाकारली आणि घर खरेदी करण्याची संधी सोडून दिली. त्या निर्णयाचा फारसा परिणाम त्यावेळी जाणवला नाही. मात्र आता त्यांना तो निर्णय चुकीचा ठरल्याचे वाटत आहे.
काही दिवसांपूर्वी ते त्याच परिसरात एका मित्राच्या घरी गेले असताना त्यांनी 1 BHK घराच्या सध्याच्या किमतीबद्दल माहिती घेतली. त्यांना त्या घराची किंमत तब्बल 90 लाख रुपये असल्याचं सांगण्यात आलं. म्हणजेच 2020 मध्ये 30 लाख रुपयांना उपलब्ध असलेल्या घराची किंमत आता सुमारे 60 लाख रुपयांनी वाढल्याचं समजलं.
या वाढलेल्या किमतीमुळे बंगळुरूमधील काही घरमालकांना आपली मालमत्ता विकण्यापेक्षा ती भाड्याने देणं अधिक फायदेशीर वाटतंय. घरातून नियमित भाडे मिळत असल्याने मालमत्ता विकण्याची गरज अनेकांना वाटत नाही.
Reddit पोस्टवरील एका युजरने सांगितलं की, त्याने 2018 मध्येच घर खरेदी केलं होतं. त्याच्या म्हणण्यानुसार, काही वर्षांत त्याची EMI पूर्ण होईल, तर त्याच परिसरातील शेजारी आजही त्या घरासाठी सुमारे 40 हजार रुपये दर महिन्याला भाडं देतायत. त्यामुळे घर खरेदी केल्याचा दीर्घकालीन आर्थिक फायदा झाल्याचे त्याला वाटते.
बंगळुरूमध्ये घरांच्या वाढत्या किमतीसोबतच भाड्याच्या उत्पन्नाकडेही लोकांचं लक्ष वाढलंय. काही Reddit युजर्सनी शहरातील घरांमधून मिळणारे भाडं तुलनेने अधिक असल्याचं त्यांच्या अनुभवातून सांगितलं.
That_Driver9237 यांच्या अनुभवात 30 लाख रुपयांचा फ्लॅट न घेण्याचा निर्णय आणि त्याच घराची आता 90 लाख रुपयांपर्यंत पोहोचलेली संभाव्य किंमत हा मुख्य मुद्दा आहे. त्या काळात कार खरेदीला प्राधान्य दिलं असलं तरी आजच्या बाजारभावाकडे पाहताना त्यांना मोठी आर्थिक संधी हातातून गेल्याचं जाणवतंय.