Priya More
आषाढी एकादशीनिमित्त राज्याचे मुख्यमंत्री एकनाथ शिंदेंनी सपत्नीक विठूरायाची पूजा केली.
राज्याचे मुख्यमंत्री एकनाथ शिंदे आणि त्यांच्या पत्नी लता शिंदे यांच्या हस्ते शासकीय महापुजा संपन्न झाली.
या महापूजेला मुख्यमंत्र्यांचे वडील संभाजी शिंदे, पत्नी लता शिंदे, मुलगा खासदार श्रीकांत शिंदे, सून वृषाली श्रीकांत शिंदे आणि नातू रुद्रांश हे देखील उपस्थित होते.
यंदा अहमदनगर जिल्ह्यातील नेवासा तालुक्यातल्या वाकडीचे भाऊसाहेब मोहनीराज काळे आणि त्यांच्या पत्नी मंगल काळे या शेतकरी दाम्पत्यांना पुजेचा मान मिळाला.
भाऊसाहेब काळे आणि त्यांच्या पत्नी यांनी मुख्यमंत्र्यांसोबत शासकीय पूजा केली.
हे पती-पत्नी गेल्या २५ वर्षांपासून भास्कर गिरी महाराज यांच्यासोबत देवगड ते पंढरपूर अशी पायी वारी करतात.
राज्यात नुकतीच पावसाला सुरुवात झाली असून यंदाचे पर्जन्यमान समाधानकारक ठरावे, अशी मुख्यमंत्र्यांनी विठुराया चरणी प्रार्थना केली.
तसंच, राज्यातील बळीराजा सुखी समाधानी व्हावा हे आणि एवढेच मागणे मी विठुरायाच्या चरणी मागितले असल्याचे त्यांनी सांगितले.
जनसेवेचा जो वसा माझ्या हाती पांडुरंगाने सोपवला आहे तो असाच पुढे नेण्याचे बळ मला मिळावे एवढीच इच्छा मनोमन त्याच्याकडे व्यक्त केली, असे त्यांनी सांगितले.
आषाढी एकादशीच्या दिवशी विठ्ठल-रखुमाईची विधीवत महापूजा करण्याचे भाग्य मला मिळाले, असे मुख्यमंत्र्यांनी सांगितले.
सलग दुसऱ्या वर्षी सावळ्या विठुरायाचे मनोहर रूप डोळ्यात साठवून ठेवत त्याची मनोभावे आराधना करण्याची संधी मला मिळाली, असे ते म्हणाले.
महापूजा करतानाचे मुख्यमंत्र्यांचे कुटुंबासोबतचे फोटो सध्या सोशल मीडियावर व्हायरल होत आहेत.