Surabhi Jayashree Jagdish
बाईकचं इंजिन हा तिचा महत्त्वाचा भाग असतो. इंजिन ऑईलमुळे इंजिनमधील भाग सहजपणे काम करतात आणि त्यांच्यातील घर्षण कमी होतं. ऑईल वेळेवर न बदलल्यास इंजिनच्या कामावर परिणाम होऊ शकतो आणि दुरुस्तीचा खर्चही वाढू शकतो.
प्रत्येक बाईकसोबत कंपनीकडून एक मॅन्युअल बुक दिलं जातं. त्यामध्ये कोणत्या प्रकारचं इंजिन ऑईल वापरायचं आणि किती किलोमीटरनंतर ते बदलायचं याची माहिती असते. त्यामुळे ऑईल बदलताना बाईकच्या कंपनीने दिलेल्या सूचनांचं पालन करणं आवश्यक आहे.
बाईकच्या इंजिनमधून नेहमीपेक्षा जास्त आवाज येत असेल तर त्याकडे दुर्लक्ष करू नका. इंजिन ऑईल कमी झालं असेल किंवा त्याची क्वालिटी खराब झाली असेल तर इंजिनच्या कामावर परिणाम होऊ शकतो. अशा वेळी ऑईलची पातळी तपासा आणि गरज असल्यास मेकॅनिककडून बाईक तपासून घ्या.
बाईकचं इंजिन नेहमीपेक्षा जास्त गरम होत असेल तर त्यामागे अनेक कारणं असू शकतात. इंजिन ऑईल कमी असणं किंवा त्याची गुणवत्ता खराब होणं हे त्यापैकी एक कारण असू शकतं. त्यामुळे इंजिन जास्त गरम होत असल्यास ऑईलची पातळी आणि स्थिती तपासून घ्या.
काही बाईकमध्ये पहिल्या सर्व्हिसनंतर दर ३,००० ते ४,००० किलोमीटरनंतर इंजिन ऑईल बदलण्याची गरज असू शकते. मात्र प्रत्येक बाईकसाठी हे अंतर सारखं नसतं. बाईकचं मॉडेल, ऑईलचा प्रकार आणि कंपनीने दिलेल्या सूचनांनुसार ऑईल बदलण्याचं अंतर ठरवावं.
तुमची बाईक रोज शहरात किंवा जास्त वाहतूक असलेल्या रस्त्यांवर चालत असेल तर इंजिनवर अधिक ताण येऊ शकतो. अशा परिस्थितीत इंजिन ऑईलची स्थिती नियमितपणे तपासणं महत्त्वाचं असतं. ऑईल लवकर बदलण्याची गरज आहे का, हे बाईकच्या मॅन्युअलमधील सूचनांनुसार ठरवा.