मुंबई : राज्यात शिंदे गट (Eknath Shinde) विरुद्ध शिवसेना असा राजकीय संघर्ष सुरू असतानाच एक मोठी बातमी समोर आली आहे. शिवसेना (Shivsena) राज्यसभेचे खासदार संजय राऊत (Sanjay Raut) यांना ईडीने समन्स बजावलं आहे. माहितीनुसार पत्रा चाळ जमीन घोटाळा प्रकरणी हे समन्स बजावण्यात आलं असून त्यांना 28 जूनला चौकशीसाठी हजर राहाण्याचे आदेश ईडीने दिले आहेत. दरम्यान, ईडीने समन्स बजावताच खासदार संजय राऊत यांनी ट्विट केलं आहे. "माझी मान कापली तरी मी गुवाहाटीचा मार्ग स्विकारणार नाही.या..मला अटक करा" असं संजय राऊत यांनी म्हटलं आहे. (Sanjay Raut Latest News)

एकीकडे शिंदे गटाने बंड केल्याने शिवसेना अडचणीत सापडली आहे. तर दुसरीकडे शिवसेनेच्या बड्या नेत्यांना ईडीकडून समन्स बजावण्यात येत आहे. विशेष बाब म्हणजे राज्याचे परिवहनमंत्री व शिवसेनेचे नेते अनिल परब यांची सुद्धा सध्या ईडीकडून चौकशी केली जात आहे. त्यातच आता खासदार संजय राऊत यांना ईडीने समन्स बजावलं असल्याने काय ती नोटीस काय ते टायमिंग अशीच चर्चा महाराष्ट्रात रंगली आहे.

दरम्यान, ईडीने समन्स बजावताच संजय राऊत यांनी एक ट्विट करत सूचक इशारा दिला आहे. "मला आताचा समजले ED ने मला समन्स पाठवले आहे.छान.महाराष्ट्रात मोठ्या घडामोडी सुरू आहेत. आम्ही सगळे बाळासाहेबांचे शिवसैनिक मोठ्या लढाईत उतरलो आहोत मला रोखण्यासाठी..हे कारस्थान सुरू आहे. माझी मान कापली तरी मी गुवाहाटीचा मार्ग स्विकारणार नाही.या..मला अटक करा" असं संजय राऊत यांनी आपल्या ट्विटमध्ये म्हटलं आहे.